Висахьа сан ойланехь 

Висахьа сан ойланехь, 
Волахьа цкъа мукъна г1енах, 
Тохахьа меллаша не1, 
Наб йохош хан йоцчу хенахь. 

Генахьа ма сеца хьо, 
Дийцахьа, хьо муха веха? 
Сан дахар..?Д1аеха-кх со, 
Ца яьхча йолий со, пекъар. 

Хьо мелла а г1айг1ане го, 
Ахь стенна йо техьа ойла? 
Сан ирсах ма хьега хьо, 
Хьан ирсах со хьегайойла. 

1индаг1ехь хьан 1индаг1 го, 
Кхин суна х1ума-м ца дисна… 
Ткъа корехь – хеназа ло… 
Сайн цхьаллехь со цхьалха йисна. 

Вист а ма ца хуьлу хьо, 
Я х1умма дац соьга ала? 
Ца лаахь, ца оьшу…Сох 
Кхин хир бац хьан дагна бала. 

Д1авоьдуш, ма къовлахьа не1, 
Дитахьа са хьайга тийса. 
Висахьа сан ойланехь, 
Сел ч1ог1а хьо оьшуш хилча…