Кимдир сенинъ халкъын? Урф-адетлер бармы?
Ёкъса дигерлернинъ къанун сени тез ютармы.
Сайлав тек сенден, дюшюн. Кунь-кунден
Вакъыт кене беклемей. Мытлакъ бугуньден

"Бисмиллях",- деп сен эр бир ишни япсанъ,
Бакъсанъ, нетиджелер келир, къысмет олса.
Мында къысмет эбет эр дакъкъада
Тувгъан топракъта, тувгъан Ватанында.

Медениет ичинде олмакъ - бордж боюнда.
Ана тилини бильмесенъ айип дегиль ми санъа?
Не къадар чокъ асрет бизим миллет чекти.
Къабаатсыз омюрлер бу дюньядан чыкъты.

Сюргюнлик, яныкъ – сене къыркъ дёртюнджи.
Бундан эвель да джинает халкъымызгъа къаршы
Апансыздан чыкъа эди. Олюмлер, ачлыкъ,
Санки демек: бирден бир юректе бинъ мых.

Буны унутмайыкъ биз, амма бирлик къайда?
Аталарымыз темель эткен ёлда.
Бир ёл, бир макъсад, бир тиль, бир фикир.
Буны бильмесек, аджеба, ким билир?

Багълама:
Ким? Ким биледжек, эгер биз дегиль?!
Ким инкишаф этеджек, эгер биз дегиль?!
Омюр – бир имтиан бу дюньяда, тамам
Биль не ерде элял, не ерде арам!

Ким дуалар окъуджакъ, эгер биз дегиль?!
Ким несиль къураджакъ, эгер биз дегиль?!
Омюр – бир имтиан бу дюньяда, тамам
Биль не ерде элял, не ерде арам!

Саба эрте тургъанда, акъшам исе яткъанда,
Куньлер девамында, акъылында тут, тут!
Унутма ким сен, кимлер тамырында.
Йылларнен халкъ азапта къайтты. Кене умют.

Тарихни биль. Ким, эгер сен дегиль
Ана-баба догъгъан ерининъ догъру бир векиль.
Ялыбою, дагълар, чёль – бирликте къувет.
Арам олгъан шейни алсанъ - юректе къасевет.

Пек мукъайт ол! Арам ёллар чокъ.
Амма бизим адетке коре олар ёкъ эди, ёкъ!
Ярынки алымыз не оладжакъ? Аслы
Такъдиримиз бизден гъайры, кимге багълы?!

Ана-тилини тап яшлыкътан огренмек керек.
Я бильмесен насыл къырымтатарсынъ сен, демек?
Вакъыт къум киби беш пармакъ арасындан.
Къырымлыгъыны яшагъанда бильгинен къорчала.

Къавий къатты иман олмакъ керек, тек хатырла
Дюньяларынынъ башында "Ля илляхи илляллах".
Бир ёл, бир макъсад, бир дин, бир фикир.
Буны бильмесек, аджеба, ким билир?

(Багълама)

Урф-адетлер, тилимиз,
Медениет, бильги, динимиз
Бизим къолларымызда….
ИншАллах.