ԴՈւ ԻՄ ՄՈւՍԱՆ ԵՍ

Գուսան Շերամ

Դու իմ մուսան ես,

Առանց քեզի, երգել չեմ կարող,

Սրտիս տավիղը, բացի քեզնից,

Էլ չունիմ լարող:

Սիրուն, սև աչերուդ, կարմիր վարդ այտերուդ,

Շուխ մազերուդ, շանթ ունքերուդ,

Էլ ի՞նչ սուրմա է, հարկավոր է,

Աննման փերուդ:

Քեզնից հեռու,

Դառն է մնալ, ապրել միայնակ,

Կուզես սպանի, կուզես կյանք տուր,

Սիրուն աղավնյակ:

Զարդ ու զարդարանք,

Էլ ի՞նչ է պետք, դու սիրուն ղուշ ես,

Մարմինդ է զուգված, ալ խալերով,

Դրախտի նուշ ես:

Ափսոս ջահել ես,

Նոր ես ծաղկել, փնջիկ ես գարնան,

Քեզ ջան եմ տալիս, չեմ հասկանում,

Անգութ հոգեհան: