Кая киттең
Җ.Усманов көе Хәсән Туфан сүзләре 

Белми калдым, күрми калдым:
Киттең… Хушлашмадың да.
Эзең генә калды миңа
 Йөргән сукмакларыңда.

Кая киттең? Кемнәр алды —
Давыллармы, сулармы?
Эзләреңдә — ромашкалар,—
Истәлегең шулармы?

Кайсы кошлар, исемең белән
 Сиңа кычкыра кебек;
Урмандагы һәрбер чәчәк
 Сине юксына кебек…

Кая киттең? Кемнәр алды —
Давыллармы, сулармы?
Эзләреңдә — ромашкалар,—
Истәлегең шулармы?

Истәлеккә эзләреңдә
 Зәңгәр гөлләр үсәләр.
Кемнәр мине юатырлар,
Гөлне карлар күмсәләр?..

Кая киттең? Кемнәр алды —
Давыллармы, сулармы?
Эзләреңдә — ромашкалар,—
Истәлегең шулармы?