Ez stuont ein frouwe alleine
und warte uber heide
und warte ire liebe,
so gesach si valken fliegen.
»sô wol dir, valke, daz du bist!
du fliugest swar dir liep ist:
du erkíusest dir in dem walde
einen bóum der dir gevalle.
alsô hân ouch ich getân:
ich erkós mir selbe einen man,
der erwélten mîniu ougen.
daz nîdent schoene frouwen.
owê wan lânt si mir mîn liep?
jô engerte ich ir dekeiner trûtes niet.«