Вся святы́я помяну́вше, па́ки и па́ки ми́ром Го́споду помо́лимся.
Го́споди, поми́луй.
О принесе́нных и освяще́нных Честны́х Даре́х.
Го́споди, поми́луй.
Я́ко да Человеколю́бец Бог наш, прие́мь я во святы́й, и пренебе́сный, и мы́сленный Свой Же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
Го́споди, поми́луй.
О изба́витися нам от вся́кия ско́рби, гне́ва и ну́жды.
Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Го́споди, поми́луй.

Дне всего́ соверше́нна, свя́та, ми́рна и безгре́шна у Го́спода про́сим.
Пода́й, Го́споди.
А́нгела ми́рна, ве́рна наста́вника, храни́теля душ и теле́с на́ших у Го́спода про́сим.
Пода́й, Го́споди.
Проще́ния и оставле́ния грехо́в и прегреше́ний на́ших у Го́спода про́сим.
Пода́й, Го́споди.
До́брых и поле́зных душа́м на́шим и ми́ра ми́рови у Го́спода про́сим.
Пода́й, Го́споди.
Про́чее вре́мя живота́ на́шего в ми́ре и покая́нии сконча́ти у Го́спода про́сим.
Пода́й, Го́споди.
Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем суди́щи Христо́ве про́сим.
Пода́й, Го́споди.

Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.
Тебе́, Го́споди.

И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га, Отца́, и глаго́лати: