Энъ дюльбер йырлар яратырым, 
Энъ муим ишлер беджерерим. 
Меним ёл берген йылдызларым, 
Сиз ичюн, анам, сиз ичюн, бабам. 

Не олса да, сиз янымдасыз, 
Келеджегими къайгъырасыз.
Гедже-куньдюзи тырышасыз 
Мен ичюн. 

Анам, бабам, тынч аятымсыз, 
Чичек ачкъан гулизарымсыз. 
Ярыкъ сачкъан нурларымсыз 
Эминлик къанатларымсыз. 
Хатырынъызны насыл тапайым? 
Къадринъизге насыл етейим? 
Омюринъиз узакъ олсун,
Ана-бабам!

Насиат иле къабул этем, 
Сарсылмаз аят къанунларыны. 
Айткъан сёзюнъиз меним ичюн 
Мукъддес, мукъаддес. 

Не олса да, сиз янымдасыз, 
Келеджегими къайгъырасыз.
Буюк севгинъиз
Ана-бабам, ич сёнмез! 

Ана-бабам, ах, не эйлейим? 
Къадринъизге насыл етейим? 
Омюринъиз узакъ олсун, 
Ана-бабам.