Музыка Любы Болуровой, стихи Биляла Аппаева.

Къыш сууукълада джылыу излесек,
Биз ушатабыз джазгъа.
Джай иссиледе тенглешдиребиз
Сизни салкъын аязгъа.

Гокка ханслача, ариулукъ салыб,
Сейирлик джерибизде,
Иги муратла, иги умутла
Туудура кёлюбюзде.

Припев:
Джолубузгъа тийириб джарыкъ кюн,
Бизге къанат бересиз, тиширыула.
Бизден бек сюе билгенигиз ючюн,
Сизни артыкъ сюебиз, тиширыула.

Кёгюрчюн кибик, сакълайсыз отдан
Сиз джерни юсюн хаман.
Кёгюбюз чууакъ, рахат джашайбыз -
Джарыкъды бизни заман.

Джолубуз кенгди, бир билек болуб,
Таймай алгъа барабыз.
Къууанч кюнде да, джарсыу кюнде да
Биз халал тенг болабыз.

Припев.

Хар насыбны да тамалы болгъан
Сиз огъурлу анасыз.
Сабийлеригиз джарыкъ ышара,
Юйге къууанч саласыз.

Нюр сыфатыгъыз булут кюнде да
Бизге джарыкъ этеди.
Сюймеклигигиз кюч бериб хаман,
Таукел алгъа элтеди.

Припев.