Муз. и сл. народные.

Кърым семенлери Азнаур къабакъгъа келдиле,
Ала аннга ханса, бийсе уа демелле.
Азнаур къабакъны ала къазсыз, тауукъсуз этдиле,
Къазанланы къызбайны сауутсуз-сабасыз этдиле.

Ала  андан Ачемез къабакъгъа келдиле,
Бу элде ханнга бир кечеге кимни къатыны ариуд дедиле.
Ачемезни къатынчыгъы ариу Боюнчакъ
Бургъан чачлы, джумушакъ сёзлю, оюнчакъ.

Ачемезге Кърым хан келечисин салгъанды,
Буну адамы салыб джигит Ачемезге баргъанды.
- Мени хан да келечиге санга ийгенди,
Юйюнден дженгил къораб кетсин дегенди.

Юйюнден а дженгил къораб кетсин дегенди,
Ариу Боюнчакъны хан кесине излейди.
- Излей эсе, патчах бла хан бирди,
Башха болмай къатын бла джан бирди.

Ханны къатыным бла хатерин кёралмам,
Джаным саулай къатынымы бералмам.
Ол джууаб бла келечиси къайтханды,
Ханнга барыб бу хапарны айтханды.

- Итден туугъан Ачемез алай джигит эсе уа,
Атасындан къалгъан къой сюрюую къайдады?
Хан а алай залим хан эсе,
Алгъын туугъан тюнгюч уланы къайдады?

Алай эштгенлей, хан секириб тургъанды,
Сермеб алыб, сауутларын такъгъанды.
Ачемезни юйюне барыб, къакъгъанды.
Ариу Боюнчакъ ханны аллына чыкъгъанды.

- Къурманынг болайым, аурууунгу алайым,
Терк огъуна тёше-мёшелени салайым,
Тийрем, хоншум сёзчюдюле, тийме, къой,
Джарыкъ айны бир кесекге батма къой,

Хан а кетди кёзюуге дери эшикге,
Ачемез садагъын салыб турду тешикге.
Хан келиб тёше-мёшеге олтургъанд,
Ариу Боюнчакъ ханны чарыкъларын тартханд.

Джигит Ачемез садагъын чардакъдан атханд,
Акъ орунну къызыл къандан толтургъанд...
Ханны кийизге чырмаб, салдыла чанагъа,
Джандет бош болсун Ачемезни табхан анагъа.