Музыка и стихи Альберта Узденова.

Чууакъ кёкден кёлек тигиб кийсенг да,
Джулдузладан тюйме этиб тиксенг да,
Сен ыйлыкъма атанг кийген кийимге,
Къапталында аны халы тюймеге!

Сен ыйлыкъма топракъ башлы юйлеге,
Сен ыйлыкъма, атанг есген тийреге,
Сени сыйынг, намысынг да алада,
Джашасанг да накъут-налмаз къалада!

Чий алтындан чурукъланы кийсенг да,
Джанынг саудан эскертменги кёрсенг да,
Сен ыйлыкъма атанг кийген чабыргъа,
Ахлуларынг сенге къазар къабыргъа!

Башха халкъны тёбен этиб кюрешсенг,
Тукъум сайлаб, халкъны эки юлешсенг,
Ана тилни учуз этиб сёлешсенг,
Адамлыгъынг джокъду, анга ыйлыкъ сен!

Бир онгсузну аякъ тюбге теблесенг,
Сыйсыз ишни этгенлеге сый берсенг,
Джолоучугъа сатыб берсенг айранны,
Таулу тюлсе, ким эсенгда, бил аны!

Чагъыр ичиб, таулума деб къычырсанг,
Джутлугъунг бла, дуния малгъа сатылсанг,
Намыс, адеб кете барыр сенден кенг,
Сагъыш эт да, бу затлагъа ыйлыкъ сен!