ПАРЛЫЛАР ЙЫРЫ

Азат Исҡужин көйө
Мотал Рәмов шиғыры

Бәхет икән тормош юлын
Парлап үтеүе,
Етәкләшеп, ҡартлыҡтарға
Килеп етеүе.

Һиңә ашҡынам.
Һиңә ҡул һуҙам.
Яндарымда һин булғанда
Мин һис юғалмам!

Киләсәккә өмөт биреп,
Үҫә балалар.
Ҡыуанырбыҙ, беҙгә улар
Терәк булһалар.

Һиңә ашҡынам.
Һиңә ҡул һуҙам.
Яндарымда һин булғанда
Мин һис юғалмам!

Тик күгебеҙ аяҙ торһон,
Булмаһын һуғыш!
Йөрәккә ҡан һауҙырмаһын
Әрнеүле һағыш!

Һиңә ашҡынам.
Һиңә ҡул һуҙам.
Яндарымда һин булғанда
Мин һис юғалмам!

Айҙар-йылдар артта ҡалыр,
Үҙгәрер заман.
Бары икәү бергә-бергә
Ҡалырбыҙ һаман.

Һиңә ашҡынам.
Һиңә ҡул һуҙам.
Яндарымда һин булғанда
Мин һис юғалмам!