Нәфсе даръяларын буйламайыҡ

"Ғүмер" тигән был төшөнсә
Бер һулыш ҡына икән,
Эсеп тә һыуһын ҡанмаҫлыҡ
Селтер генә шишмә икән.

Нәфсе даръяларын буйламайыҡ,
Һәммәбеҙгә өлөш бүленгән.
Кемдәр белә, яҙмыш тарафынан
Беҙгә күпме ғүмер бирелгән.

"Ғүмер" тигән был төшөнсә
Торғаны бизмән икән,
Йә шатлыҡҡа, йә ҡайғыға
Һала ла тора икән.

"Ғүмер" тигән был төшөнсә
Гел дауыл ғына икән,
Имәндәй ныҡ ирҙәрҙе лә
Ҡаҡшатып ҡуя икән.