Мондаш лиеш мо шочмо-кушмо верым,
Садер лоҥгаш верланыше ялем?
Кумда пасум, яндар Немда вÿд серым
Мондаш огеш лий - мый эре шарнем.

Эрат-касат эре улат шинчаштем,
Шонен илем кеч-куш каем гынат.
О, шочмо мланде, тый кумда тÿняште
Нимо деч шерге мыланем улат.

Йоча жап годым тыште модын коштым,
Сöрал йомак гай тудо жап эртен...
А кö ок шарне школыш коштмо корным?
Йÿштат-шокшат - чыла ужаш пернен.

Кеҥеж кастене, тымык йÿд лиймеке,
Мурен-куштен, ял мучко коштынам.
Ломбер коклаште, вес гана ужмешке,
Мый ÿдыръеҥым шокшын шупшалынам.

Мондаш лиеш мо шочмо-кушмо верым,
Садер лоҥгаш верланыше ялем?
Кумда пасум, яндар Немда вÿд серым
Мондаш огеш лий - мый эре шарнем.