Тиринь авай, тон авинем,
Тондеть ушодан моро.
Теке лайшезь валт ладсинек,
Штобу ледстямс тонть парот.
Тонть эйкакшот ды тонть нуцькант
Прок нармунькайть ливтязь тусть.
Эйсэст учат вальмас нучказь
Сельметь ланга таргавсь сув.

Или авардть, иля ранга,
А кадтадызь тонь ськамот.
Бути, авай, берякадат,
Эстень сайдян эрямо.
Сыречинть печтямс а шожда,
Икельксэнь шумбрачись маштсь.
Эсь мельгат якамс а кода,
Нать, секс пазось эйкакшт макссь.

Весе шкат ды весе алеть
Миненек, авай, максыть.
Симдить, андыть, оршить, карсить,
Ломанькс миньсэнек кастыть.
Ней вана минек сась чимек
Паросо пандомс парот.
Алксот-прялксот полавтсынек,
Ашокс кирдьснэк панарот.

Мадть тон, авай, лекстяк-оймсек, 
Пек сизесть кедеть-пильгеть.
Лиясто а стяват овсе,
Апак удо юты веть.
Кшить ды салот свал икелеть,
Пси корштамо, тантей ведь.
Сыречись маштынзе теветь,
Авай крёст кисэнек тейть.
Сыречись маштынзе теветь,
Авай крест кисэнек тейть.