Добрай ночы, Янка,
Салодкіх сноў, да сустрэчы авосьмай.
Ты маеш шэсць гадзін калыханкі,
Адпачын ад адносін...
Няхай у тваім сне ўсё будзе як трэба:
Пяшчотнае сонца й цёплае мора,
Няхай Пан Бог усьміхаецца з неба,
Крыху будзе меней гора.

Няхай у тым сне раптам скончацца войны,
Няхай там будзе салодкі пах хлеба,
Хай будзе наш край багаты й вольны,
З чыстым паветрам, урадліваю глебай,
Хай дзеці смела глядзяць у вочы аблокаў,
І няхай тых аблокаў ня будзе,
Хай песня ляціць высока-высока
І на вятры шчасцем поўняцца грудзі...

Няхай вакол нас лунаюць анёлы,
Хай будзе моцы iсці па дарозе,
У той, што ёсць дачкою вясёлкі,
Хай хопіць веры чакаць на парозе,
Хай будзе плячо, каб спытацца прытулку,
Любімыя вочы, каб прасіць прабачэньня...
У гушчары непрыкметных завулкаў
Не забыць аб сваім прызначэнні...