(сен де мен де ішімде) 

- Сенесің бе? 
- Ау?! 
- Сезіп жүрмін! 
- Нені? 
- Сені! 
Кезіп жүрмін... 
Төзіп жүрмін... 
Бұл - сезім! 
- Қойшы... 
- Шын сөзім! 
- Сенбеймін! 
- Білемін! 
- Қайдан? 
- Айтты... Күмәншіл жүрегің! 

- Кешір... 
- Не үшін? 
- Кешіктім... 
- Неден? 
- Көңіл емес қағыппын қабырғасын есіктің! 
- Бәлкім... 
- Қандай ауыр 
- Сөзім бе?! 
Иә... Алдамшы ә көзің! 
- Ау? 
- Ештеңе өзім... 

- Шығасың ба? 
- Қайда? 
- Анау айға... 
- ... 

- Біліп едім... 
- Тағы нені? 
- Үндемейсің. 
- Енді не дейін? 
- Тым болмаса тілдегейсің! 
- Кімді? 
- Мені! 
- Не деп? 
- Білмеймін... Сөйлеші әйтеу елеп! 
- Осының бәрі не үшін? 
-Маған керек!!! 

- Тағы да түн 
- Иә... 
- Жұлдыздар ағылатын 
Құшақтардан табылатын... 
Біреуім бар сағынатын. 
- Біреу? 
- Біреу! 
- Бәлкім көп... 
- Жоқ! Біреу! 
- Ым... 

- Мен кеттім... 
- Жақсы. 
- Салыңды тақшы 
Суық! 
- Жақсы. 
- Мен емес, сен кеттің! 
- Иә! 
- Мен осындамын. 
- Енді? 
- Бәрбір қасыңдамын. 

- Қорқам! 
- Құдай-ау неден? 
- Сенен? 
- Менен? Не үшін? 
- Менікі - өмір, сенікі -өлең! 
- Түсінікті... 
- Иә солай! 
- Осыны о баста ішім ұқты. 
- Нені? 
- Ақынмын..! 
- Иә! ақынсың, 
- Тұрақсыз... Соларға жақынсың. 
- Күлкілі... 
- Неге? 
- Сенерсің бір күні. 
- Көреміз... 
- Иә, көнеміз! 
Сенеміз! 
Келеміз! 
Көңілдің құтысы сынғанша... 
- Түсінбедім? 
- Түсінбегін! 

- Жарайды кірдім, 
- Жақсы... 
- Не болды? 
- Сен кеше күлдің... 
- Енді? 
- Бүгін ше?! 
- Күлмеймін. 
- Неге? 
- Білмеймін. 
- Жарайды рақмет! 
- Не үшін? 
- Бір күлкі, бір қасірет мұң үшін! 
Кездескен кездейсоқ түн үшін. 
- Кездейсоқ? 
- Осы дұрыс! 
- Ым... 

- Тоқташы! 
- Тағы не? 
- Бір қарап алайын... 
- Қайда? 
- Жүзіңе... 
Көзіңе... 
Өзіңе... 
- ... 

- Қайырлы түн! 
- Қайырлы! 
- Еx, айырды? 
- Ау? 
- Ештеңе, әдет қой байырғы. 
- Ым... 

- Жылжиды бәрі уақытпен 
- Иә! 
- Бірақ мен бақытты ем! 
- Қалайша? 
- Сөйлескен... бұйырмас бақытпен! 
- ... 
© Марғұлан АҚАН
27.12.2016