Нурлы Казан
Тәслимә Низами шигыре, М.Мухин көе

Иңгән мәллә Нурлы Казан
Салават күпереннән.
Җиде район – җиде төсе,
Елантау нәселеннән.

Кушымта:
 Бердәнбере татарымның,
 Сыенырлык кыясы.
 Мең тарихлы, Кол Шәрифле
 Гүзәл Казан каласы.

Иман нуры сибеләдер
Күккә иңгән айлардан.
Яралган безнең татарлар
Гыйльми, тырыш җаннардан.

Кушымта: шул ук.

Таш пулатлар тезелгәннәр
Җәннәт бакчаларында.
Мең һөнәрле гигант шәһәр
Яши татар җанында.

Кушымта: шул ук.

Акбүз атта дуслык йөри
Күпмилләтле мәркәзем.
Ак барслы татар иле
Таң калдыра җир йөзен.

Кушымта: шул ук.