Уарзон Ирыстон! Дæ номы кадæн 
Лæууæм цырагъау мах уырдыг,
Ды дæ нæ уарзты æнусон авдæн,
Ды – нæ цин æмæ хъыг!
Фæхæрæм мах дæ зæххæй ард,
Дæ ном дын исæм бæрзонд,
Удуæлдæй дын кæнæм лæггад,
Дæууæн у нæ цард нывонд!

Уæ, Стыр Хуыцау! Дæ хорзæх, Дæ арфæ – 
Иры Уæзæгæн Ды цардамонд ратт! 

Уæззау уыд дæ ивгъуыд, Иры бæстæ,
Зылди дæ фæдыл сау фыдох,
Фæлæ-иу уæддæр дæ фарны рæстæй 
Кодтой дæ зынтæ рох. 
Царды рухсмæ æдзух цыдтæ, 
Фыдбонты нæ саст дæ ныфс, 
Сæрбæрзонд алкæддæр уыдтæ, 
Æргомæй размæ цæуыс!

Уæ, Стыр Хуыцау! Дæ хорзæх, Дæ арфæ – 
Иры Уæзæгæн Ды цардамонд ратт! 

Фыдæлты æрдхæрæн, Иры Уæзæг! 
Зæрдæйы тæгтæй дæ нывæзт, 
Ацы дунейы нын масты уæзæй 
Ма у дих æмæ уæрст, 
Дугæй дугмæ нæрæд дæ ном, 
Бæрзонддæр кæнæд дæ кад, 
Дæ ныфсæй мах цæрæм æнгом,
Дæ фæрцы рухс у нæ цард! 

Уæ, Бæсты Фарн! Дæ хорзæх, Дæ арфæ – 
Нæ уарзон Ирæн Ды иу амонд ратт! 
Ном æмæ йын кад!