Ичӧтик да косіник,
Чукырӧсь да дзор,
Шоныдінас, косінас
Уджавлін тэ кор?!
Гӧрлін тэ да ытшкылін,
Бертлін сывъя пу.
Тӧдлін кочӧг бытшкылӧм,–
Мудзтӧ он нин шу!

Ок мыйта,
Мыйта сьӧкыдсӧ пыкин да венін!
Но эн измы – век мелі да шань.
Вай жӧ енлы моз копыртчам тэныд,
Коми ань.

Война вылысь верӧсыд
Юрсӧ бӧр эз вай.
Сэки, тэрыб вӧраса,
Вӧчин кыклысь пай.
Пӧдтін гусьӧн дойястӧ,
Сьӧлӧмнад эн усь.
А ӧд мустӧм войясыд –
Быдӧн сэтшӧм кузь!

Ок мыйта,
Мыйта курыдсӧ пыкин да венін!
Но эн измы – век мелі да шань,
Вай жӧ енлы моз копыртчам тэныд,
Коми ань.
Колин посни челядьӧн,–
Пасьтӧд найӧс, верд.
Но эн некор элясьлы,
Видлывлін кӧть, дерт.
Абу вывсьыд кымынӧс
Велӧдін тэ со.
Коді лыддяс, кымынӧс
Пуктін налы ноп!

Ок мыйта,
Мыйта тшыгӧмсӧ пыкин да венін!
Но эн измы – век мелі да шань.
Вай жӧ енлы моз копыртчам тэныд,
Коми ань.

Воясыд оз косавны,
Чукырсьыд он мын.
Ичӧтик да косіник,–
Кутшӧм тэнад вын!
Миян олӧм сулалас
Уна–уна нэм,
Лӧза–вежа му вылас
Тэ кодьыс кор эм!

Ок мыйта,
Мыйта шогсӧ тэ пыкин да венін!
Но эн измы – век мелі да шань.
Вай жӧ енлы моз копыртчам тэныд,
Коми ань. 

CD "И воис лун, кор помасис война..."