Да воскреснетъ Богъ, и расточатся врази его.

Пасха священная намъ днесь показася. Пасха нова, святая, Пасха таинственная, Пасха всечестная, Пасха Христосъ избавитель. Пасха непорочная, Пасха великая, Пасха вѣрныхъ, Пасха двери райскія намъ отверзающая. Пасха всѣхъ освящающая вѣрныхъ.

Яко изчезаетъ дымъ, да исчезнутъ.

Пріидите отъ видѣнія жены благовѣстницы, и Сіону рцыте: пріими отъ насъ радости благовѣщенія Воскресенія Христова. Красуйся, ликуй и радуйся, Іерусалиме, Царя Христа узрѣвъ изъ гроба, яко жениха происходяща.

Тако да погибнутъ грѣшницы отъ лица Божія, а праведницы да возвеселятся.

Мѵроносицы жены, утру глубоку, представшя гробу Жизнодавца, обрѣтоша Ангела на камени сѣдяща, и той, провѣщавъ имъ, сице глаголаше: что ищете Живаго съ мертвыми, что плачете Нетлѣннаго во тли, шедше проповѣдите ученикомъ Его.

Сей день, егоже сотвори Господь, возрадуемся и возвеселимся въ онь.

Пасха красная, Пасха, Господня Пасха! Пасха всечестная намъ возсія! Пасха! Радостію другъ друга обимемъ! О Пасха! Избавленіе скорби, ибо изъ гроба днесь яко отъ чертога возсіявъ Христосъ, жены радости исполни, глаголя: проповѣдите апостоломъ.

Слава Отцу и Сыну и Святому Духу, и нынѣ и присно и во вѣки вѣковъ. Аминь.

Воскресенія день, и просвѣтимся торжествомъ, и другъ друга обнимемъ, рцемъ: братiе! И ненавидящимъ насъ простимъ вся Воскресеніемъ и тако возопіимъ:
Христосъ воскресе изъ мертвыхъ, смертію смерть поправъ и сущимъ во гробехъ животъ даровавъ.