Під облачком явір похылений,
Сьпіват на ним пташок премиленій.
Слухай мила як тот пташок сьпіват,
Же з любови нич добре не быват,
Же з любови (2) нич добре не быват.

Ци та любов є од Бога дана,
Ци лем може дяблом підшептана?
Хоц бис не хтіл то мусиш любити,
Хоц бис потім прото мал терпіти,
Хоц бис потім (2), прото мал терпіти.

Мила, мила, ты покусо єдна,
Уж тя люблю, не рік, ани не два.
Ци-с мі дала зіля ся напити?
Не мож мила нияк без тя жыти.
Не мож мила (2), нияк без тя жыти.

Мі циґанка давно ворожыла,
Же мя здурит дівка чорнобрива,
Же не буду виділ за ньом сьвіта,
Аж проминут моі млады літа.
Аж проминут (2), моі млады літа.

Під облачком явір зеленіє -
Посмотр мила, як ним вітер хвіє.
Може вырве його з коренями...
Мила, мила, што то буде з нами?
Мила, мила, мила моя, што то буде з нами?