Сыр барвалэс кана дживэна 
дэ баро форо йо рома, 
до кхэр, галёв, на "вы" кхарэна 
пхурэ ромэс до тыраха.

- Чюв кокоро ромэскэ чяё, 
дыкх, хачино, мэ тэ дукхал. 
- Мэ адалэ ромэс не знаю, 
мэк сыгидыр кхэрыстыр джял.

Прэ кухня джян, - ромны пхэнэла, - 
и по рома - нанэ ль матэ. 
О драб понабутка чювэла, 
тэ кокори саро выпьел.

Ёнэ - рома-интеллигенты, 
сыр о гадже ачнэ мурша, 
пал-одова и алимэнты 
чювэн пэ лэндэ ль ё ромня.

Фэдыр гаджестыр ту залэса 
дэ длуго набутка ловэ: 
"Кэ ром жэ на поджява лэса, 
пхэнэла: пшалоро, нанэ."

Ту пуч ромэстыр, кон исыс ёв, 
савэ ромэнца ль бария, 
пхурэ рома саро рипирна, 
и ёв, галёв, на бистырдя.

Сыр пиранго ёв пэ улица 
пхирэлас даса пало васт, 
сыр на исыс, кай приютиться, 
сыр бокхало сутя до кхас.

Сыр да ракирлапэ, ромалэ, 
из грязи в князи вы и я, 
исыс мануш - кана, щявалэ, 
ёв барвало о ром ачья.

Сыр барвалэс кана дживэна 
дэ баро форо йо рома, 
до кхэр, галёв, на "вы" кхарэна 
пхурэ ромэс до тыраха.