Seigneurs, sachiez: qui or ne s'en ira
En cele terre ou Deus fu morz et vis
Et qui la croiz d'Outremer ne prendra,
paines mès ira en Paradis.
Qui a en soi pitié ne remenbrance,
Au haut Seigneur doit querre sa venjance
Et delivrer sa terre et son pais.

Tuit li mauvès demorront par deça,
Qui n'aiment Dieu, bien ne honor ne pris;
Et chascuns dit: «Ma fame, que fera?
Je ne leroie a nul fuer mes amis.»
Cil sont cheoit en trop fole atendance,
Q'il n'est amis fors que cil, sanz dotance,
Qui pour nos fu en la vraie croiz mis.

Or s'en iront cil vaillant bacheler
Qui aiment Dieu et l'eneur de cest mont,
Qui sagement vuelent a Dieu aler,
Et li morveus, li cendreus demorront;
Avugle sont, de ce ne dout je mie.
Qui un secors ne fet Dieu en sa vie,
Et por si pou pert la gloire du mont.

Deus se lessa por nos en croiz pener
Et nos dira au jor ou tuit vendront:
«Vous qui ma croiz m'aidastes a porter,
Vos en iroiz la ou mi angre sont;
La me verroiz et ma mere Marie.
Et vos par qui je n'oi onques aďe
Descendroiz tuit en Enfer le parfont.»

Chascuns cuide demorer touz hetiez
Et que jamès ne doie mal avoir;
Ensi les tient Anemis et pechiez
Que il n'ont sens, hardement ne pouoir.
Biaus sire Deus, ostez leur tel pensee
Et nos metez en la vostre contree
Si saintement que vos puissons veoir!

Douce dame, roine coronee,
Proiez por nos, virge bien auree!
Et puis apres ne nos puet mescheoir