Zer olmaz
Bedasyla jepa çekmek aýypdyr,
Mis her näçe ýalpyldasa zer olmaz.
Her näçe jan çekseň gider aslyna,
Her zag-u zägändän kebuter olmaz.

Her sährada ýatan meýit bolarmy?
Kerbeladan gaýry şehit bolarmy?
Her saçyn ösdüren seýit bolarmy?
Her başa per sanjan Isgender olmaz

Hamza men digenler Hamzaga ýetmez,
Tutsa damanyndan Syratdan ötmez,
Her jama garagan Jemşide ýetmez,
Her telpek geýenden galandar olmaz. 

Magtymguly, diliň sakla dahanda
Seniň ne işiň bar ýagşy-ýamanda,
Sohanwar men diýen köpdür jahanda,
Her kim Şah Apbas dek sohanwar olmaz.