музыка Любы Болуровой 
стихи Биляла Аппаева

Къыш сууукълада джылыу излесек, 
Биз ушатабыз джазгъа.
Джай иссиледе тенглешдиребиз 
Сизни салкъын аязгъа.

Гокка ханслача, ариулукъ салыб,
Сейирлик джерибизде.
Иги умутла, иги муратла
Туудура кёлюбюзде.

Джолубузгъа тийириб джарыкъ кюн
Бизге къанат бересиз, тиширыула.
Бизден бек сюе билгенигиз ючюн, 
Сизни артыкъ сюебиз, тиширыула. 

Кёгюрчюн кибик, сакъалайсыз отдан
Сиз джерни юсюн хаман.
Кёгюбюз чууакъ, рахат джашайбыз 
Джарыкъды бизни заман.

Джолубуз кенгди, кюн билек болуб, 
Таймай алгъа барабыз. 
Къууанч кюнде да, джарсыу кюнде да
Биз халал тенг болабыз.

Джолубузгъа тийириб джарыкъ кюн,
Бизге къанат бересиз, тиширыула.
Бизден бек сюе билгенигиз ючюн, 
Сизни артыкъ сюебиз, тиширыула.

Хар насыбны да тамамы болгъан 
Сиз огъурлу анасыз.
Сабийлеригиз джарыкъ ышара,
Юйге къууанч саласыз.

Нюр сыфатыгъыз булут кюнде да
Бизге джарыкъчыкъ эте.
Сюймеклигигиз кюч бериб хаман
Таукел алгъа элтеди.

Джолубузгъа тийириб джарыкъ кюн
Бизге къанат бересиз, тиширыула.
Бизден бек сюе билгенигиз ючюн, 
Сизни артыкъ сюебиз, тиширыула.