Стихиры на Господи воззвах, глас 4.

Стих:

Животворящему Твоему Кресту,  
непрестанно кланяющеся, Христе Боже, 
тридневное Воскресение Твое славим: 
тем бо обновил еси истлевшее человеческое естество, 
Всесильне, и иже на Небеса восход обновил еси нам, 
яко Един Благ и Человеколюбец.

Стих:

Древа преслушания запрещение разрешил еси, Спасе, 
на древе крестнем волею пригвоздився, и во ад сошед, 
Сильне, смертныя узы, яко Бог, растерзал еси: 
темже кланяемся еже из мертвых  Твоему  Воскресению, 
радостию вопиюще: Всесильне Господи, слава Тебе.

Стих:

Врата адова сокрушил еси, Господи, и  Твоею  
смертию смертное царство разрушил еси: 
род же человеческий от истления свободь, 
живот и нетление мiру даровав, и велию милость.

Стих:

На стиховне стихира воскресна, глас 4:

Господи, восшед на  Крест, прадеднюю нашу клятву 
потребил еси, и сошед во ад, вечныя юзники свободил еси, 
нетление даруя человеческому роду, сего ради поюще 
славим  Животворящее  и Спасительное  твое  Востание.

 
И прочия стихиры Пасце, с припевы их.

Слава: глас 8:

Егда явился еси во плоти Христе Боже, за неизреченное смотрение,
слышавши самаряныня слово Тебе Человеколюбца, остави почерпало 
у студенца, и тече глаголющи сущим во граде: 
приидите видите Сердцеведца, еда Сей есть чаемый Христос, имеяй велию милость?