Ой, тай-тай! Дюгер а Бадинаты да Малкъар Басияты,
Ой, алай да Басияты, дейди,
Къалмайын была да Тагы бойнуна чыкъдыла.

Ой, тай-тай! Тоноу этелле была оноу керекге,
Ой, алай да керекге, дейди.
Илишан аталла чегетде чинар терекге.

Ой, тай-тай! Аталла да, илишанны киши урмайды,
Ой, алай да урмайды, дейди.
Быллай жерледе мараучусуз къолай болмайды.

Ой, тай-тай! Алайчыкъда киши ахшысын тергейле,
Ой, алай да тергейле, дейди.
Къаражау улу Мисирбийни была кёрмейле.

Ой, тай-тай! Мисирбийсиз барыр жерлерин билмейле,
Ой, алай да билмейле дейди.
Мисирбий болма оноу этерге да сюймейле.

Ой, тай-тай! Мисирбийге "сен бар-мен бар" а болдула,
Ой, алай да болдула, дейди. 
Мисирбийге барыргъа уа киши базмайды.

Ой, тай-тай! Къубадий улу жигит туугъан Бекмырза,
Ой, алай да Бекмырза, дейди,
Жыйындан чыгъып, бир артха айланып сёлешди:

Ой, тай-тай! "Жангыз адам келечиге баргъа болмайды" деди,
Ой, алай да болмайды деди.
"Беригиз жыйындан кесим сайлагъан бир нёгер" деди.

Ой, тай-тай! "Мен бир нёгерге сангырау Геуюзню алырма" деди.
Ой, алай да алырма, дейди.
"Геуюз бла мен келечиге барырма" деди

Ой, тай-тай! Геуюз, къул болса да, бийле бла баз киши,
Ой, алай да баз киши, дейди.
Геуюз кибик а - жыйында да аз киши.

Ой, тай-тай! Эки жигит атландыла, кетдиле,
Ой, алай да кетдиле, дейди,
Къаражау къабакъны бу туурасына жетдиле.