Эй, Жаныбек, эй, уланла,
Къысыр чыранда къысырла кюте тургъанлай,
Къарап Чучхуркъамда да бир бёлек кийик кёргенме.

Эй, кёргенме, эй да, уланла,
Мен аланы сюре, къууа кетгенме,
Къолумда таягъым болмай, жаланлай.

Эй, жаланлай, эй, уланла,
Санадым да мен аланы жюз этдим,
Къара ушкокну уа бузларындан тюзетидим.

Эй, тюзетдим, эй да, уланла,
Тюзетдим эсе да бешли жугъутур ёлтюрдюм,
Къазанлыгъын а къойчу къошума келтирдим.

Эй, келтирдим, эй, уланла,
Келтирдим эсе да, мен толу къазан асханма,
Ол ит душманла ол къошха чапхан кечеде.

Эй, кечеде, эй да, уланла,
Сакълай турдум да къазаным терк бишмеди,
Сермедим да ушкогум къолума тюшмеди.

Эй, тюшмеди, эй, уланла,
Ол итлерибиз тынакы-тынакы юрдюле,
Ит душманла ыстауатха жуукъ кирдиле.

Эй, кирдиле, эй да, уланла,
Бокълауучну сабы тюшдю къолума,
Бокълаууч саб бла уруп ёлтюрдюм бирини бойнуна.