I woz
waakin doun di road road
di addah day
when a hear a lickle yout-man say

him seh:
y´u noh si mi situation
mi don´t have noh accamadaeshan
mi haffi sign aan at di station
at six in di evenin´
mi seh mi life got no meanin´
ah jus´ livin´ widout feelin´

still
mi haffi mek a raze
kaw [bad word] af age
an mi want fi goh rave

I woz
waakin doun di road
annadah day
w´en ah hear annadah yout-man say

him seh:
mi naw wok fi noh pittance
mi naw draw dem assistance
mi use [bad word] a lickle rackit
but wha, di police dem di stap it
an ah had woz to hap it

still
mi haffi mek a raze
kaw [bad word] af age
an mi want fi goh rave

I woz waakin doun di road
yet annadah day
w´en ah hear annadah yout-man say

him seh:
mi haffi pick a packit
tek a wallit fram a jackit
mi haffi dhu it real crabit
an´ if a lackit mi haffi pap it
an´ if a safe mi haffi crack it
ar chap it wid mi hatchit
but
mi haffi mek a raze
kaw [bad word] af age
an mi want fi goh rave