Wičháĥčala waŋ, na thawíču kiŋ owóte thípi waŋ ektá ípi. Yuŋkháŋ, wičháĥčala kiŋ wóyute lená wahóye: thaló yukpáŋpi waŋ, na bló-ičhéğuğuyapi eyá, na mnikáphopapi waŋ. Hó yuŋkháŋ wóyute kiŋ kahípi na wáŋčagna thaló yukpáŋpi kiŋ waksíŋ na yukhínuŋkhaŋ na thawičú kiŋ okhíse k’ú. Naháŋ bló-ičhéğuğuyapi kiŋ glawá na akhé okhíse thawičú kiŋ k’ú. Yuŋkháŋ, mnikáphopapi kiŋ kítaŋla yağópiŋ na thawičú kiŋ yağób-khiyíŋ na wičhíyokogna égle. Na heháŋl wičháĥčala kiŋ thaló yukpáŋpi okhíse kiŋ ĥ’aŋhíya yašpášpa yaŋké. Ičhúŋhaŋ, oyáte eyá wičhíthaŋwokšaŋ yaŋkápi kiŋ hená naĥmála awíčhayutapi na léčhel okíčhižižipi:
“Úŋšiyakel! Hená líla waĥpáničapi čhá heháŋyela ophéthuŋpi okíhipi itéke,” eyápi ke.
Watóhaŋl yuŋkháŋ wičháĥčala kiŋ thaló yukpáŋpi okhíse kiŋ thebkíyiŋ na waná bló-ičhéğuğuyapi kiŋ glúl yaŋké. Ičhúhaŋ, khoškálaka waŋ wáglotapi kiŋ él hí na wóyute eháke húŋĥ ophéwičhakičathúŋ čhíŋ kéye. Wičháĥčala kiŋ iĥá éyaš leyá ayúpte:
“Hiyá, ítokha šni yo. Táku k’éyaš uŋkókičhič’upi s’a,” eyé kiŋ.
Hó čhá khoškálaka kiŋ khíyotakiŋ na akhé wawáŋyaŋg yaŋké. Winúĥčala kiŋ naháĥči tákuni yúte šni. Íŋše hignáku kiŋ él étuŋwaŋ yaŋké. Na wáŋlwaŋčala mnikáphopapi kiŋ kítaŋla yağópe. Hó čhá akhé khoškálaka kiŋ él wičháhi na owíčhakiyakiŋ na wóyute saŋphá ophéwičhakičathúŋ kte ĥčiŋ kéye. Hó éyaš winúĥčala kiŋ heyé:
“Hiyá, táku k’éyaš uŋkókičhič’upi s’a.” eyé kiŋ.
Watóhaŋl yuŋkháŋ wičháĥčala kiŋ wól iglúštaŋ na ité kpakhíŋte. Na naháĥčiŋ thawíču kiŋ tákuniš yúte šni. Hó čhá khoškálaka kiŋ él hí na léčhel wíyuŋğe:
“Táku čhá ayáphehaŋ hwo?” eyá čhá winúĥčala kiŋ héya ayúpte:
“Hí kiŋ é čhá awáphe ye,” eyé kiŋ.