Манаурап тау үстінен көрінсе ай,
Бір сезім тербетеді көңілді жай.
Ән кернеп, жас жанымды мазалайды,
Тартады мені өзіне Тобылғы сай.

А-ай, жұлдызымсың нұрын шашқан,
Әнімсің айналайын Тобылғы сай.

Сылдырап тау астынан ағады өзен,
Кеудемді кернеп менің барады өлең.
Ең алғаш бақыт таптым бір өзіңнен,
Құлағым сен дегенде қағады елең.

А-ай, жұлдызымсың нұрын шашқан,
Әнімсің айналайын Тобылғы сай.

Сайыңнан жұпар гүлін тергем талай,
Айғанмен қол ұстасып алтын арай,
Өзіңмен махаббатым шоқ боп жанған,
Айналдым, қуанышым - Тобылғы сай.

А-ай, жұлдызымсың нұрын шашқан,
Әнімсің айналайын Тобылғы сай.