Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.

ГРЯДИ́ТЕ ВЕ́РНИИ, ХВАЛА́МИ И ПЕ́СНЬМИ СВЕТОНО́СНУЮ ЦЕ́РКОВЬ УБЛАЖА́ЮЩЕ, БЛАГОЧЕ́СТИЯ ДЕРЖА́ТЕЛЕМ ПРОСИЯ́ВШУЮ, В НЕ́ЙЖЕ ВСЕМИ́ЛОСТИВАГО ХРИСТА́ БО́ГА НА́ШЕГО ДА ПРОСЛА́ВИМ, ВОПИЮ́ЩЕ: ПОЕ́М ТЕБЕ́ БО́ГУ НА́ШЕМУ, Я́КО ПРОСЛА́ВИСЯ.

Блажени чистии сердцем, яко тии Бога узрят.

У́М ДА ВОЗВЫША́ЕТСЯ ВСЕ́Х ВЕ́РНЫХ К НЕБЕ́СИ́, ВЫ́СПРЬ СЕДЯ́ЩЕМУ, В ПРЕБОЖЕ́СТВЕННЕЙ ЕГО́ ЦЕ́РКВИ, И ЛИКОВСТВУ́ЮЩЕ ВЕ́РНО, ПОЧТИ́М БО́ЖЕ́СТВЕННОЕ ПРА́ЗДНЕСТВО, СМИРИ́ВШАГО ЗЕМНАЯ С НЕБЕ́СНЫМИ.

Блажени миротворцы, яко тии сынове Божии нарекутся.

ЛИКОВСТВУ́ЮТ С НА́МИ ДНЕ́СЬ КУ́ПНО ВСЯ А́НГЕЛЬСКАЯ ЧИНОНАЧАЛИЯ, НЕ ЧУ́ВСТВЕННО, НО ДУХО́ВНО ОБСТУПА́ЮЩЕ, ВЛАДЫ́КО, ТВОЮ́ СВЯ́ТУ́Ю ЦЕ́РКОВЬ, ТЫ́ ЖЕ СВЫ́ШЕ МИ́Р ТВО́Й ПОДА́ЖДЬ НА́М, Я́КО ВСЕМИ́ЛОСТИВ.

Блажени изгнани правды ради, яко тех есть Царство Небесное.

ЛИКУ́ЕТ ДНЕ́СЬ С НА́МИ ЛИ́К ПРОРО́ЧЕСКИЙ, КУ́ПНО ЖЕ И АПО́СТОЛЬСКИЙ, СПА́СЕ, И ВСИ́ МУ́ЧЕНИЧЕСТИИ ЛИ́ЦЫ, ДУ́ХОМ ПРОЗРЯ́ЩЕ ТЕБЕ́ МНОГОИМЕНИ́ТАГО БО́ГА, ВЕ́РНЫМИ СЛА́ВИМА.

Блажени есте, егда поносят вам, и изженут, и рекут всяк зол глагол на вы лжуще Мене ради.

ШЕСТОКРИ́ЛЬНИИ, МИ́ЛОСТИВЕ, И МНОГООЧИ́ТИИ ХЕРУВИ́МИ, ВЛАДЫ́КО, ТВОЕМУ́ ПРЕСТО́ЛУ ПРЕДСТОЯ́ЩЕ СЛА́ВЯТ. И́ХЖЕ ПОСЛИ́ НА́М ВЕРНЫМ, И ОСВЯТИ́ ТВОЮ́ БОЖЕ́СТВЕННУЮ ЦЕ́РКОВЬ С ВОПИЮ́ЩИМИ: СЛА́ВА СИ́ЛЕ ТВОЕ́Й, СЛА́ВА, ХРИСТЕ́, СНИЗХОЖДЕ́НИЮ ТВОЕМУ́.

Радуйтеся и веселитеся, яко мзда ваша многа на небесех.

ДАВИ́Д ВОЗВЕЛИ́ЧИСЯ, СПА́СЕ, ТВОИ́М БОЖЕ́СТВЕННЫМ ПРОСИЯ́ ДУ́ХОМ, ПРОПОВЕ́ДАВЫЙ ОТ ДЕ́ВЫ ТВОЕ́ РОЖДЕ́СТВО́: ТЫ́ ЖЕ, Я́КО ВСЕМИ́ЛОСТИВ, ВОЗВЕЛИ́ЧИ И ВОЗВЫ́СИ ТВОЮ́ СВЯТОЛЕ́ПНУЮ ЦЕ́РКОВЬ БОЖЕ́СТВЕННУЮ.

Слава:

ЦА́РСТВУЕТ ПРИ́СНО ТВОЕ́ ПРЕБОЖЕ́СТВЕННОЕ И́МЯ, О́ТЧЕ, СЛО́ВЕ ЖЕ И ДУ́ШЕ, ЛЮ́БЯЩИМ ТЯ́ СВЫ́ШЕ, Я́КО МИ́ЛОСТИВ, МИ́РНУЮ УПРАВЛЯ́Й ЖИ́ЗНЬ.

И ныне:

ТРАПЕ́ЗУ СЛО́ВА ЖИ́ЗНЕННАГО, НЕИСКУСОБРА́ЧНАЯ МАРИ́Е, РАЗУМЕ́ХОМ ТЯ́ ВЕ́РНИИ, ОТ ПЛОДА́ ПОПО́ЛЗШИИСЯ: ПЛОДО́М ЖЕ ЧРЕ́ВА ТВОЕГО́ К СВЕ́ТУ РАЗУ́МНОМУ ПРИВЕДЕ́НИ БЫ́ХОМ.