Къой сюрюуле солумлада отлайла, 
Тик сыртланы кюнбетледе толтуруб, 
Сюрюучюле бир-бирлерин джокълайла, 
Туура джерде, мал къатында олтуруб. 

Припев: 
Сюйгенчигине, 
Джарыкъ кюнюне 
Сюрюучю джырла этеди. 
Малларын джая, 
Кёзлеу суулагъа 
Ол ашыкъмайын элтеди. 

Ол малларын чарпытмайын сакъларгъа, 
Семиртирге тенглери бла эришед. 
Джуукъ атлай къойларына, маллагъа, 
Хыны этмей, къозу тилде сёлешед. 

Припев. 

Кюн себеди алтын нюрюн таулагъа. 
Эштиледи шоргъа таууш къулакъдан. 
Къарачы джаз тёгерекге, хаугъа! 
Кёредиле кёбле келиб узакъдан.