Көҙгө күктән болоттарҙы йыйнап, 
Йылы яҡҡа оса аҡоштар. 
Оҙаҡламаҫ, килеп етәр инде 
Аҡ буранлы һалҡын аҡ ҡыштар. 

Ҡауырыйҙар оса ҡош юлынан, 
Моңдар яуа ергә һибәләп. 
Шул моңдарҙы йыям устарыма 
Һәм тирбәтәм наҙлап, иркәләп.

Белмәһәм дә ҡоштарҙың телдәрен,
Һағыштарын аңлап, моңдарын.
Йәнем-тәнем менән тоям барын,
Ошо хаҡта минең йырҙарым.

Ҡауырыйҙар оса ҡош юлынан, 
Моңдар яуа ергә һибәләп. 
Шул моңдарҙы йыям устарыма 
Һәм тирбәтәм наҙлап, иркәләп.

Ҡоштарҙы ла кешеләр шикелле
Ситкә илтәләр шул яҙмыштар.
Нисек кенә моңланмаһын инде
Сит яҡтарға осҡан аҡҡоштар.
 
Ҡауырыйҙар оса ҡош юлынан, 
Моңдар яуа ергә һибәләп. 
Шул моңдарҙы йыям устарыма 
Һәм тирбәтәм наҙлап, иркәләп.