Величит душа моя воскресшаго тридневно от гроба Христа Жизнодавца.
Величит душа моя волею страдавша, и погребена и воскресшаго тридневно от гроба. 
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же Чистая красуйся Богородице, о возстании Рождества Твоего. 
Христос новая Пасха, Жертва живая, Агнец Божий, вземляй грехи мира. 
Ангел вопияше Благодатней: чистая Дево, радуйся, и паки реку, радуйся: Твой Сын воскресе тридневен от гроба, и мертвыя воздвигнувый, людие, веселитеся. 
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же Чистая красуйся Богородице, о возстании Рождества Твоего.
Возбудил еси уснув мертвыя от века, царски рыкавый, яко от Иуды лев. 
Магдалина Мария притече ко гробу, и Христа видевши, яко вертоградаря вопрошаше. 
О божественнаго, о любезнаго, о сладчайшаго Твоего гласа! С нами бо неложно обещался еси быти до скончания века, Христе: Егоже вернии, утверждение надежды имуще, радуемся. 
Ангел облистаяй женам вопияше: престаните от слез, яко Христос воскресе. 
Христос воскресе, смерть поправый, и мертвыя воздвигнувый, людие веселитеся.
О Пасха велия и священнейшая, Христе! О мудросте, и Слове Божий, и сило! Подавай нам истее Тебе причащатися, в невечернем дни Царствия Твоего.
Днесь всяка тварь веселится и радуется, яко Христос воскресе и ад пленися.
Днесь Владыка плени ада, воздвигнувый юзники, яже от века имяше люте одержимыя. 
Согласно, Дево, Тебе блажим вернии: радуйся, двере Господня, радуйся граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения. 
Величит душа моя Триипостаснаго и нераздельнаго Божества державу.
Радуйся, Дево, радуйся, радуйся, Благословенная, радуйся Препрославленная: Твой бо Сын воскресе тридневен от гроба. 
Веселися и радуйся, божественная двере Света: зашедый бо Иисус во гроб, возсия, просияв солнца светлее, и верныя вся озарив, богорадованная Владычице.