Тэлэһийэн сылдьаммын
Тэһийбэтэх күннэрбэр,
Дойдум дьонун буламмын
Дьоллономмун үөрэбин.
Кинилэрдиин миигин көрсөр
Ийэ салгын сиккиэрэ,
Хойуу оттоох өҥ хочо,
Наҕыл хатыҥ сипсиэрэ.

Хос ырыата:

Дойдум дьоно дууһабар
Аанньал курдук ыалдьыттар,
Ахтан, суохтаан көрсөрбөр
Аҕам, ийэм курдуктар.

Эҕэрдэлии сыдьаайар
Истиҥ чугас мичээрдэрэ,
Илгэ алаас сарсыардатын
Илдьэ кэлбит курдуктар.
Чэрдээх лобуой ытыстарын
Ыга тутан турдахпына,
Төрүт буорум угута
Итии хааммар кутуллар.

Хос ырыата.