музыка Маджита Ногайлиева
стихи Хусея Джаубаева

Къаяны башында 
Наратчыкъ битгенди.
Кесине джолланы
Бек къыйын этгенди.

Акъ къайын наратха
Джеталмай къарайды.
Бизни да арабыз
Узакъды алайды.

Ол эки ёзенде
Эки да шоркъачыкъ, 
Бир джырны джырлайла
Бек ариу, бек ачыкъ.

Къошулуб къалыргъа 
Таралыб джашайла. 
Бизде да джюрекле
Алагъа ушайла.

Къургъакъсыб баргъан джел
Суусабын табалмай,
Булут да турады
Бир джаууб къалалмай.

Сен булут эсенг а,
Джер болуб къалырма,
Сюймеклик тамчыдан
Джашнаргъа хазырма.