Тауларымда гара суула, дарман суула,
Шахарымда таза хауа, солургъа кел.
Басхан ауузу, Чирик кёл, Чегем тары
Чакъыралла шуёхум, къонакъгъа кел.

Тёгереги къалын агъач къуршалагъан,
Таулары, къалала болгъан жашил тюзле,
Къонакъгъа чакъыралла, кел жолдашым,
Кел жазда, сюйсенг къышда, сюйсенг кюзде.

Басхан ауузу ариулукъну туугъан жери,
Кёпле солуп кетедиле келип бери,
Къонагъан багъалайды малкъар халкъым,
Хар кимни къарындашха ачыкъ бети.

Тёгерекде къууаты бар кюнню, айны,
Терек бахчагъа бёленнген тюзле, таула.
Кел шуёхум, сыйын кёр къонакъбайны,
Жерими саулукъ кючю санга саугъа.

Ариу кёрюп сыйлайбыз биз къонакъ келсе,
Аямайды малкъар халкъым тузун, ашын.
Минги Тау алгъыш аякъ кётюреди,
Саулукъ берип ашырады къарындашын!