Ауыл кисе, таҫмаларҙан
Эй ағыла ят моңдар.
Ниндәй моңһоу әллә инде
Телһеҙ ҡалған гармундар!

    Әйт ауылым! Ҡайҙа һуң моң?
    Моң ҡайҙа һуң әйт урам!?
    Аулаҡ өйлө, һәм гармунлы
    Йәшлегемде һағынам.

Ауыл кисе, ник һуң моңһоу
Күңелем ник буш шулай
Өй түрендә тальян гармун
Моң һағынып, зар илай!

Йөрәктәргә осҡон һалып
Гармунымда уйнайым
Ауылыма моңдар биреп
Урамдарҙы буйлайым!

Ауыл кисе, йәш йөрәктәр
Гармун моңға һыуһаған
Һөйгән булып, моңдар ҡайтһын
Ауылыма яңынан!