музыка Маджита Ногайлиева
стихи Азамата Суюнчева

Джаш:
Кёкле тюбюнде, кёкбаш юйледе
Джашайды ариу Кёгала.
Экибиз бирге кюйюб барабыз,
Кёгала, санга тарала.

Кёгала:
Кёкле тюбюнде, кёкбаш юйледе
Мен бек къайгъысыз джашаеем.
Тойгъа-оюнга къошулмай эдим,
Мен сюймекликден ташаеем.

Джаш:
Джарыкъ джулдузча сени сыфатынг
Къууат салады шахаргъа.
Ышаргъанчыгъынг, ала кёзлеринг
Къоймайла бизни джашаргъа.

Кёгала:
Бизни тийреге сиз тойгъа келиб,
Юйде олутуруб кетигиз,
Бирден кёзюме къараб, ышарыб,
Мени тынчлыкъсыз этдигиз.

Джаш:
Субай санынга ариу джарашхан
Сен кёкбетли чепкен кийесе.
Экеулен болуб сени сюебиз,
Сен къайсыбызны сюесе?

Кёгала:
Экигизге да бир сёзюм джокъду
Джашла сиз ашхы, аламат,
Халал тенглени шохлугъун бузсам,
Не айтыр манга джамагъат?

Джаш:
Экибиз бирге аллынга келдик,
Бир-бирибизден уяла,
Халал тенглени харам этме да
Бирин сайлачы, Кёгала.

Кёгала:
Экигизни мен айырмайын,
Бирча багъалы кёреме.
Айыб этмегиз, тюзюн айтайым,
Мен башха джашны сюеме.