Dou mal qui m'a longuement
Fait languir plaisanment
Merci bonnement
Ma dame jolie,

Pour qui je vueil liement
Souffrir la maladie
Qui en amoureus tourment
Nuit et jour mouteplie,
Pour ce que sans finement
L'aim et tres finement
La serf humblement,
Sans penser folie.
Dou mal qui m'a longuement
Fait languir.

Car je suis si ligement
Mis en sa signourie
Que ja mais aligement
Ne quier avoir m'aïe,
Se de li n'est proprement,
Qui debonnairement,
M'ocist doucement,
Quant merci li prie.
Dou mal qui m'a longuement
Fait languir.

Et se ma dame plaisant
Qui d'onnour est garnie
Savoit qu'amourseusement
Me muir, à chiere lie,
Pour li servir loyaument,
Ma peinne, vraiement,
Bien et hautement
Tenroie à merie.
Dou mal qui m'a longuement
Fait languir plaisanment
Merci bonnement
Ma dame jolie.