Күңелемә дауа кеүек була
Көн дә һине иҫкә алыуым,
Нишләр инем, әгәр был донъяла 
Һин булмаһаң тыуған ауылым.

Хушлашҡанда һиҙмәгәнмен икән
Йөрәгемдең һиндә ҡалыуын,
Ғүмер үткән һайын мин нығыраҡ 
Һағынамын һине ауылым.

Яҙмышымда күрҙем күкрәүен дә
Күрҙем йән тетрәткес дауылын,
Юлым ҡайҙа ғына юлыҡһа ла
Онотманым һине ауылым.

Юҡҡамы ни һиңә ашҡыныуым,
Хис ҡуҙында баҙрап яныуым,
Әсәм элгән сәңгелдәгем һиндә,
Атам йорто һиндә ауылым.