Птушкам з выраю, птушкам з выраю
Кожнай вясной вяртацца да тваіх дуброў.
Ты, зямля мая белакрылая,
Бераг высокі белых буслоў.

Сіні дым над пералескамі,
А над ім неба палескае,
Над усім сіла нябесная,
Над усім краем маім.

З даўняй даўніны аблачынамі
Ціха плывуць у небе думы курганоў.
Ты, зямля мая, белакрылая,
Бераг высокі белых буслоў.

Стану птушкаю і над пушчаю
Я паплыву у вырай, каб вярнуцца зноў
На зямлю маю беларускую,
На белы бераг белых буслоў.