музыка Альберта Узденова
стихи Азрета Семенова

Кюнню тюбю, джерни башы дунияда,
Ариулукъну сейир джурту - Учкулан,
Джулдузлагъа тие-тие тауларынг,
Джюрегингде джырлаб келген кёк Къобан.

Эки джанынг тизгин-тизгин тийреле, ой, тийреле,
Кёз алдарча ариу-ариу бёлюнюб,
Биченликле, таш хунала, тёбеле,
Урунууну ёмюр ызы кёрюнюб.

Къалай тазад ёзенинги хауасы,
Артыкъсыз да нарат ийис, тау эртден,
Бютюн сейир Махар сууну гарасы,
Аууругъанны ёмюрлюкге сау этген.

Мен да сени тыбырынгда туугъанма,
Киндигими ахлуларым кесгенле,
Суунг бла санларымы джуугъанла,
Чынг тёрюнгде эрке болуб ёсгенме.

Учкуланны анам кибик кёргенме,
Туугъанлы да балсытама мен аны,
Хурзукну да, Къартджуртну да сюеме
Эгечлерим сюйген кибик анамы.