Музыка и стихи Раисы Токумаевой.

Ана деген дуниягъа баш болгъанд,
Ана сёзю ач балагъа аш болгъанд.
Къартайды эсе, акъ чачына хурмет бер,
Сенича, ол да бир заманда джаш болгъанд.

Къартайды эсе, санга бергенд джашлыгъын,
Сени бакъгъанд, унутуб кеси ачлыгъын.
Ана хакъын къайтарыргъа эринме,
Ачма анга джюрегинги ташлыгъын.

Припев:
Келчи, анам, бери джет,
Сер баланга оноу эт.
Соруб келмез ёлюм бизге,
Сау кёзден акъ сютюнгю халал эт.

Джашлыгъында санга джарыкъ джол болгъанд,
Эркелетиб, минг-минг кере къор болгъанд.
Ма бюгюн а ариу бети саргъалыб,
Джаякълары ызлыкъ-ызлыкъ джол болгъанд.

Припев.

Ма ол джолла, сыйлы джолла сыйласанг,
Ана хакъы джибермейди къыйнасанг.
Зорлукъ этсенг, артда тюшер эсинге,
Ол зорлукъну ёз балангда сынасанг.

Припев.

Джашлыгъында джол этгенди джюрегин.
Санга сокъгъанд ол джюрекни тиегин.
Къарт, къарыусуз уучунга тюшгенде
Къысма аны ачытырча сюегин.

Припев.

Ачыуунгда бек ачырыкъ анангды,
Къууанчынгда къууанырыкъ анангды,
Таб кир болуб сен кёзюне тюшсенг да.
 Уумай турлукъ джангыз сени анангды.

Припев.

Ауанасы да сыйлыды анангы.
Бек сыйлыды аны билиб сыйласанг,
Сау кёзюнден сыйсыз этиб, сындырыб,
Табалмазса артда анам, деб джыласанг.

Припев.