За ўсё, што сёння маю,
Што даў мне мой народ:
За кут у родным краю,
За хлеб-соль без клапот, -

Я адплацiў народу,
Чым моц мая магла:
Зваў з путаў на свабоду,
Зваў з цемры да святла.

Для бацькаўшчыны беднай,
Для ўпаўшых яе сiл
Складаў я гiмн пабедны
Сярод крыжоў, магiл.

Змагаўшыся з напасцяй
За шчасце для людзей,
Не раз пiсаў у няшчасцi
Крывёй сваiх грудзей.

Уносiў гэтым долю
Сваю для ўсiх дабра,
А болей... Што там болей
Жадаць ад песняра?

Паслярэвалюцыйныя вершы, 1926