Какшан сер ӱмбалне ломбо
Лумла койын пеледеш. 
Шӱшпык муро ӱдыр чоным
Йӱлалтале кас велеш.
Шӱшпык муро ӱдыр чоным
Йӱлалтале кас велеш.

Коштеш ӱдыр сер воктене, 
Кодшо шошым шарналтен, 
Тунам тудо ик кастене 
Таҥже дене ойырлен.
Тунам тудо ик кастене 
Таҥже дене ойырлен.

Юл вӱд серыш кайыш каче, 
Кунам тудо пӧртылеш?
Письмам веле ӱдыр таче
Чонжо вургыжын лудеш. 
Письмам веле ӱдыр таче
Чонжо вургыжын лудеш.

Воза каче: «Жап шумешке
Ӱшанен илал мылам. 
Угыч ломбо пеледмеке, 
Тый декет мый пӧртылам».
Угыч ломбо пеледмеке, 
Тый декет мый пӧртылам».

Какшан сер ӱмбалне ломбо 
Лумла койын пеледеш.
Шӱшпыкланже ӱдыр чоным
Йӱлалташ шагал кодеш.
Шӱшпыкланже ӱдыр чоным
Йӱлалташ шагал кодеш.