Ein meister las,
Troum unde spiegelglas,
Daz sie zem winde
Bi der staete sin gezalt
Loup unde gras,
Daz ie min fröide was,
Swiez nu erwinde,
Iz dunket mich also gestalt;
Dar zuo die bluomen manicvalt,
Diu heide rot, der grüene walt.
Der vogele sanc ein [bad word] ende hat;
Dar zuo der linde
Süeze und linde.
So we dir, Werlt, wie dirz gebende stat.

Heiliger Krist,
Sit du gwaltic bist
Der werlte gemeine,
Die nach dir gebildet sint,
Gib mir den list
Daz ich in kurzer frist
Alsam gemeine
Dich sam diniu erwelten kint.
Ich was mit sehenden ougen blint
Und aller guoten dinge ein kint,
Swie mine missetat der werlte hal.
Mache mich reine
min gebeine
Versenke sich in daz verlorne tal.