Һин килтерҙең миңә иманымды,
Көс-ҡеүәтем, барлыҡ илһамды,
Һинең өсөн һәр саҡ әҙермен мин
Урап сығырға был йыһанды.

Беләм, бәлки лайыҡ түгелмендер
Һине һөйөргә, мин - диуана,
Һинең яҡтан ҡоштар осоп ҡайтһа,
Йөрәк ярһый, күңел ҡыуана.

Мөхәббәтем бары һөйөү генәм
Бар йөрәгем буйлап ҡабынды,
Көмбәҙемдә йондоҙ булып яндың,
Мәңгелек мин уға табындым.

Һоҡландыра һинең ҡыйыулығың,
Күңелемдә наҙлы тауышың,
Ә һындарың, гүйә, тау бөркөтө,
Бер ҡарашың дошманды өркөтөр.