ЙОМАШЫМ
(Баймаҡ районы)
Лилиә ҺАҠМАР шиғыры

Кәрәк түгел һис тә алтын һарай,
Йылы аҡ өйҙәрем булғанда.
Ниңә әле шомло тынлыҡ иле?
Рәхәтерәк ыҙғар буранда.

Ҡушымта:
Әйтегеҙсе, тағы ниндәй ауыл
Гүзәлерәк беҙҙең Йомаштан?!
Үркәс тауҙар илен күрер өсөн
Ҡайтыр инем ҡасып ожмахтан.

Ана, Йомашымды ҡурсаларға
Теҙелешеп килгән тауҙары,
Ҡулға тотоп талдар гөлләмәһен
Бик ашығып аҡҡан Һаҡмарым...

Ҡушымта.

Серем иткән саҡта эшсән ауыл,
Яҙылдырып талған тәндәрен,
Төндөң  ай-ҡәләме шиғыр яҙа,
Тоҡандырып йондоҙ-шәмдәрен.

Ҡушымта:
Әйтегеҙсе, тағы ниндәй ауыл
Гүзәлерәк  беҙҙең Йомаштан?!
Үркәс тауҙар илен күрер өсөн
Ҡайтайыҡ беҙ ҡасып ожмахтан!